US ram Texas state, Midland khua ah a ummi Maureen Sui Neih Par (kum 15) cu vawleicung huap in minthang a simi Oxford University (England), Yale University (US) le Harvard University (US) nih full scholarship in university kai dingah an sawm. Hi University pathum lakah Maureen Par nih cun Harvard University ah kai dingin biakhiahnak a tuah cang.
Maureen Par hi a ngandam lomi a si caah online in Keystone School ah a kaimi a si. Atu hi tang 9 a kai lio a si. Tang 9 caminpuai an phitnak ah Texas state chungah a thiam bik (top 1) a si caah minṭhatnak trophy an pek. Cu kong cu an theih tikah Oxford, Yale le Harvard nih an sawmnak hi a si. Harvard University nih cun biahalnak 400 aa telmi caminpuai phit ding an rak pek. Cucu voikhat phit ah US$530 liam a si, sungh ahcun phit ṭhan khawh a si. Maureen Par nih cun nihnih chung zohnak a ngeih hnuah a phit i biahalnak 400 chungah 398 cu dik tein a phit khawh caah full scholarship pek dingin an cohlan hi a si. Tang 9 in tang 12 a kai lai. Tang 10 le 11 an lonhter (skip) tinak a si.
Maureen hi hi hlan zongah a sianginn kainak ah a thiam bik sinak a hmuh lengmang. Ca lei lawng si loin Sport le nuncan ziaza lei zongah an sianginn nih an i zohthla ngai mi a si.
Hringtu a pa nih cun “Kan fanu hi amah hrimhrim ca a duh, aa zuam tuk. Cun Pathian nih a dawt caah a si. Tang 5 a kai lio tein, ka pa US lawng hmanh si lo in vawleicung huap in minthang a simi Harvard University ah kai ka duh a rak ka ti i na thiamnak nih a tlinh ahcun na kai ko lai tiah ka rak leh. Atu ah a chunmang cu Pathian nih a tak in a tlinter i kan i lawm taktak. Lunglawmhnak thlacamnak zong tuah ding kan i tim. Kanni nupa hi fale fimthiamnak biapi tuk ah a chia mi kan si caah kan harsa ko nain kum 2012 khan a nu hi riaṭuan ti hlah, nute hi thatho le lungnuam tein ca a cawn khawh nakhnga inn ah umpi ko ka ti i a nu nih a umpi. Lai lei ah sianginn bal lo mi kan si bu in kan fanu nih hi bantukin hlawhtlinnak a hmuh hi pakhatnak cu Pathian thawngin a si i pahnihnak cu kan fanu aa zuamnak thawngin a si” tiah a chim.
Maureen Par a pa cu Thantlang peng Salen khuami Pu Rual Ceu Uk a si i a nu cu Pi Mary Nang (Hakha peng Dongva khuami, asinain Kalay peng Kyia-inn ah a ummi) a si. US ah 2008 ah an phan.
Mauren Par cu Jan 1, 2022-Jul 21, 2022 tiang, thla 7 chung Illinois state ah Business training a kai lai i cu hnuah Harvaed University ah a kai te lai. Maureen Par nih cun “Oxford le Yale nakin Harvard kaa thim deuhnak a ruang cu Harvard hi ka ngakchiat tein kai ka duh peng mi a si caah a si” tiah The Chin Post ah a chim.
Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post ti te hi kan tialpiak hram u. Cheukhat cu Credit an kan pek lengmang ko nain cheukhat cu an kan pe duh bak lo. Cun cheukhat cu thawng kan laknak media Credit kan pekmi lawng an langter fawn. Rethei ngai in kan tialmi kha fawitein tangka laknak ah nan hman khawhmi cu a tha tuk ko. Credit pek tu cu kan philh ti hram hlah law tiah kan in theihter hna.
Be First to Comment