Mizoram Ah Myanmar Phaisa Sing 100 He An Tlaihmi An Thlah Ṭhan Cang

India ram, Mizoram state, Siaha District, Khaiki khua ah Myanmar rammi pakhat cu Myanmar phaisa Sing 100 MMK he January 26 ah khan Assam Rifle nih an rak tlaih i atu cu an thlah ṭhan cang, tiah theih asi. Assam Rifle nih Myanmar phaisa he an tlaih hnu ah hlathlainnak an tuah i Lunglei Ngunkhuai(tax) zung ah an kuat i India Rupee 400 a liam hnu, January 27 ah an thlah ṭhan hi asi. “Ramdang ummi ka chungle nih ramri hrawng ah ai dormi ralzaam bawmh ding ah tangka an ka kuat i cucu ka va pekchanhnak hna ah an ka tlaih hi a si,” tiah a chim.

Holh thiam lo le thil umtuning hngalh lo caah atu bantuk in tlaihkhih a ton hi a si i tualchung mi pakhat bawmhnak thawng in atu cu Myanmar Ralzaam bawmchantu phu pakhat sin ah him tein a phan kho cang, tiah theih asi. Hi kong ah Myanmar Refugees Committee (Lunglei) i rianngeitu Salai Charley nihcun, ”Ṭuanvo ngeitu hna he kan i chawnbia lai i an chuhmi Phaisa, Saikel le Phone zong laak khawh ṭhan kan i zuam lai,” tiah a chim.

India ramchung ahhin ramdang phaisa poh cu License he lawng i kennak nawl a um i, atutan ah hi bantuk in ramdang phaisa tampi luhpi hi sual lianngan tuk mi a si ko, nain Myanmar ram mi cung ah zawnruahnak a ngei i ralzaam a kan zohkhenhtu Mizoram State cozah nih theihthiamnak he tangka hi an kan khirh ṭhan lai kan i ruahchan, tiah a chim chih. Ramri humhimnak latu Assam Rifle pawl hi Myanmar ram mi India ram luhchuahnak kong ah an i thlak bal lo, nain phung nih a onh lo mi thilri cu an tlaih ṭheo i ṭuanvo ngeitu sin ah an ap tawn. Ralkap nih uknak a laak hnu in Mizoram ah Hluttaw Palai le CDM hna telh in ralzaam 30,000 hrawng an i dor lio.

Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post ti te hi kan tialpiak hram u. Cheukhat cu Credit an kan pek lengmang ko nain cheukhat cu an kan pe duh bak lo. Cun cheukhat cu thawng kan laknak media Credit kan pekmi lawng an langter fawn. Rethei ngai in kan tialmi kha fawitein tangka laknak ah nan hman khawhmi cu a tha tuk ko. Credit pek tu cu kan philh ti hram hlah law tiah kan in theihter hna.

Be the first to comment

Leave a Reply

Your email address will not be published.


*