Nithlak lei ram media cheukhat hna nih Russia nih Ukraine tuk a thawk lai, tiah an langhter mi ni February 16 cu Ukraine mizapi dihlak nih mahle inn cio ah ram thantar( Flag) zar cio i ram hla sak cio ding a si lai, tiah President Volodymyr Zelensky nih nawl a chuah. Febuary 16 ah hin Russia nih an kan tuk ding hi President Zelensky nih a zum lo, tiah Ukraine ṭuanvongeitu hna nih an chim i President nih hi ni ‘I Funtom Ni’ tiah a thanh mi hi American ram le ram dang hna chirhchan in Nitlak ram lei media hna nih February 16 ah Russia nih Ukraine a tuk lai timi an ṭialmi lehnak a si, tiah an chim.
“Febuary 16 ah Russia nih an tuk hna lai tiah an kan chimh i kan nih nihcun hi ni hi ‘I Funtom Ni’ ah kan hman lai,” tiah President Zelensky nihcun a chim. “Hi ni ah hin Russia nih raltuknak a thawk cang lai, tiah an kan ṭhih phaih, nain hi ni ahhin kan ram thantar cu kan inn cio ah kan zar hna lai i, Blue le Red(A sen le A dum) muici cu kan lu ah kan i ṭem hna lai i zeitluk in dah kan lung ai rual le kan i funtom kha vawleipi hmai ah kan langhter lai,” tiah Ukraine president Zelensky nih a chim.
Ukraine ram pumpi in February 16 zing ah ram thantar thlai cio i zing suimilam 10:00 bak ah hmunkhat te ah ramhla sa cio ding in nawl an chuah. Ukraine nihcun Russia nih tuk ding in an kan hrocer mi hi kan cohlan ko, nain February 15 ah an kan tuk taktak ding cu zumh a um lo, nitlak lei ram pawl lak i ai hrocernak lawng a si ko lai, tiah an zumh.
Russia le Ukraine buainak he pehtlai in suimilam 24 in 48 kar ah Ukraine in chuak dih ding in i tim cang u, tiah Febuary 13 in US Embassy nih Twitter in thawng an rak thanh. US National Security Advisor Jake Sullivan nihcun, “Putin nih hin Ukraine tu ding in zeitik poh ah a ralkap nawl a pek khawh hna i, a luancia ni 10 hrawng khan timhtuahnak faak deuh le kau deuh in a ngeih zong hmuh khawh a si. Tuzarh ahcun a nam taktak te ko men lai,” tiah a chim.
Febuary 13 i Ukraine President Volodymyr Zelensky le US President Joe Biden phone an i chawnh lio ah Ukraine ah rak tlawng ding in Ukraine President nih Joe Biden cu a sawm i, atulio kan tonmi thil kong ah zei bantuk ca poh ah timhcia dih kan si ve ko cang,” tiah Zelensky nih cun a chim. US nih cun Europe ram ah a ralkap a thlah pah cang hna nain Russia ralkap tu ding cun Ukraine ram i a ralkap thlah cu a tim rih lo. “Russia le US kan i kah ahcun Vawlei ralpi a thawh si ko,” tiah Joe Biden nih interview pakhat ah a chim. Cucaah Russia hi America thinhunter ding ngai cun a molh lem lai lo,” tiah a chim chap.
Hi lio ah Ukraine ramri um Russia ralkap cheukhat cu kirter an si cang, tiah nihin February 15 ah Russia nih a thanh. “Chaklei le Nitlaklei ummi Battalion hna cu an rian an lim cang caah tlanglawng le mawṭaw in an thilri an i phurh i an rak umnak camp lei ah nihin thawk in an kir cang hna,” tiah Russia Defense Ministry in biachimnak nawlngeitu pakhat nih a chim.
Ukraine kong buaibainak daihter ding in Germany Chancellor Olaf Scholz le Russia President Putin tonbiaruah an tuah hlan ah atu bantuk in Russia thawngzamh hna nih cun Russia ralkap kirter an si kong an langhter. Soviet Union chungtel hlun Ukraine ramri ah hin Russia nih ralkap thazaang 100,000 tluk a chiah hna caah Europe ram hna le American ram hna cu an lungre a thei ngai i Ukraine ram in chuah a duhmi hna caah Russia nih thazaang a pek bantuk a si pinah Russia nih a tuk taktak ahcun a faak bikmi chawleh(economy) dantatnak kan tuah lai, tiah ralrin zong an rak pek.
Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post ti te hi kan tialpiak hram u. Cheukhat cu Credit an kan pek lengmang ko nain cheukhat cu an kan pe duh bak lo. Cun cheukhat cu thawng kan laknak media Credit kan pekmi lawng an langter fawn. Rethei ngai in kan tialmi kha fawitein tangka laknak ah nan hman khawhmi cu a tha tuk ko. Credit pek tu cu kan philh ti hram hlah law tiah kan in theihter hna.
Be First to Comment